首頁 > 即時香港 >
即時新聞

【Kelly Online】港媽搭的士「大牛」冇得找 司機:係你責任

[2017-11-24 07:17]

香港的士司機的服務態度想引起爭議,近日有港媽就找續問題上網鬧爆一名的士司機時,引發網民爭議,成網上熱話。

事緣一位港媽在Facebook群組「的士司機資訊網 Taxi」分享,指乘搭的士送小朋友上學,付車資時打開錢包才發現只有500元紙幣。事主即向司機表明歉意,指自己只能以「大紙」支付42元車資。司機旋即黑面抱怨「有冇攪錯」,打開錢包指沒有零錢可找,斥責事主「無散紙係你責任,一上到車就應該講得500」。二人爭持不下,後來司機表示可以原地等事主,待找換零錢後折返支付。

不過事主送完兒子上學折回支付車資時,始知道的士司機一直都沒有停錶並持續計費,還以「行規」為由向她索取合共60元車資。事主不滿司機做生意卻沒有準備充足零錢,又批評對方沒有事先告知咪錶會繼續計費,大罵「明屈機。就係因為的士界太多你啲老屈、無禮物(貌)、係唔係都鬧嘅的士佬,的士界先無得做」

不過網民有不同睇法。有網民認為「你未完成付款,你仍然租賃緊呢架的士,的士等你或兜你去找散紙,中間嘅費用係由租賃人(即乘客)支付」、「$500、$1000點解司機有權唔收,司機冇驗鈔機喺身,某程度係保障司機,怕收到假銀紙」。但亦都有網民指司機借故「抽水」,「其實袋一千幾百一百蚊紙開工有乜咁困難,係要挑起社會仇恨的士佬。」,又指出「法例過時!30年前500係好大,宣家2個人飲茶都無咗」。

據運輸處資料,法例定明的士司機需要攜帶不少於100元的港元紙幣和硬幣零錢供找續之用。不過司機未能為500元或1,000元面額的港幣提供找續,並不屬違例。不過運輸處亦有表明,雖然司機等待乘客找換零錢時可以計費,然而必需要事先得到乘客同意。

都市網推薦新聞

熱點新聞