首頁 > 即時娛樂 >
即時新聞

B哥HiFi碟與愛女鍾懿合唱 嚴父錄碟要求高

[2017-09-23 22:56]

鍾鎮濤(B哥)縱橫樂壇多年,推出唱片無數,今年終如願錄製首張HiFi碟《A BETTER BEE》,其中一首更與愛女鍾懿合唱,他笑言怕囡囡表現得不夠好會冇面,連監製也覺他過於嚴厲,B哥笑稱這是父女溝通的方式,也大讚女兒表現專業。

B哥一直都想錄製HiFi碟,可惜未有這個機緣,有次與環球唱片高層Duncan碰面,對方問他有否興趣出HiFi碟,令他大為雀躍,終一償心願。B哥重視音樂質感,該碟邀得資深音樂製作人葉廣權監製及HiFi德的專業靚聲監控,完成錄音和混音後,送往美國製作母帶,再運到德國壓製,絕對是高質素之作。B哥更出動私伙珍藏木結他,喜言收藏的結他終可大派用場,以不同的木結他彈出層次感。他本身特別喜歡《紅葉斜落我心寂寞時》一歌,灌錄此歌時壓力最大,自言唱了幾十年,人生閱歷多了,唱歌味道跟以前大不同,不止講求技巧,而是唱出歌曲韻味。

阿女男友一嚟就趕走

《閃閃星辰》是B哥與愛女鍾懿的合唱歌,由於發燒碟緣故,B哥對女兒也有所要求,鍾懿當然不負所望,他說:「每位父母都會覺得自己子女得,但未必係眾人眼光嘅水準,怕唔夠好會冇面,所以對佢好有要求。今次阿女好專業,好快搞掂,監製叫我唔好鬧佢,其實父女傾偈係直接同唔客氣,反而監製肉赤我個女。」首次錄製發燒碟已令B哥愛上了,他指還有很多歌曲可錄第二輯,必定要有HiFi水準,若再錄國語及英文發燒碟,笑言錄到70歲都未錄完。

談到碟名《A BETTER BEE》,在娛樂圈打滾多年,覺得哪方面可加以改進或有何追求?B哥表示想嘗試做幕後,最近獲邀擔任電視劇及電影監製,仍考慮中:「覺得好玩,因為有太多idea,成日幫朋友點解唔自己做?之前不考慮是覺得太辛苦,依家覺得時機成熟。」家庭方面,B哥何止Better,簡直是The Best絕頂好爸爸,除了溫拿演出,個人甚少接其他工作,務求有更多時間陪家人,笑言是full time司機。談到日後女兒拍拖,B哥即說:「唔得!冇可能!一嚟就趕走!」這當然是玩笑話,B哥自認是個開通的人。

文:張穎芝 圖:Jess

原文刊於《星島日報》

都市網推薦新聞

熱點新聞