首頁 > 即時娛樂 >
即時新聞

謝安琪失言Say Sorry 向粉絲承諾以最佳狀態回歸

[2017-08-09 23:50]

謝安琪(Kay)為張繼聰誕下細囡張靖後,樂於專心湊仔女,復出樂壇無期。昨日Kay難得「出山」撐自己有份投資的食店開張,話想繼續學做生意、開生活館,產後身形依然圓潤的她更拋下一句「仲咁肥唱乜歌」,嚇到粉絲以為Kay隱退。

Kay上載與大仔張瞻及囡囡的合照,就她昨日的言論向大家Say Sorry,表示未來可能以最佳狀態復出,不過現階段先享受同家人相處。Kay留言:「Sorry sorry sorry,需要同大家解釋一下,我唔係覺得肥就唔可以唱歌,我表達得唔好希望大家唔好介意,我只係覺得我自己而(依)家嘅狀態,無論身體狀況定係身形線條,都同平常工作時候既(嘅)我有一大段嘅距離,並唔係我心目中嘅演出狀態。」

現階段好享受家庭生活的Kay自言,每日同得意的仔女相處好美好、寶貴,所以唔會為工作設下期限,希望可以循序漸進回復狀態。她更問粉絲:「如果有朝一日我返嚟,我希望以最佳嘅狀態同你見面為你唱歌,一言為定,好嗎? #我不著急 #我現在很快樂」。粉絲們都力撐好媽媽Kay,有人窩心留言「我等你返嚟啊...kay!!!!!點捨得叫一個啱啱生完嘅媽媽放棄同仔女相處嘅時間出嚟做嘢呀」、「一定等你準備好哂先!對你既(嘅)心從未變過!」、「好喜歡你可以很自然的享受這個時刻這個狀態」、「生完bb既(嘅)媽媽係最靚架(㗎),因為嗰份母愛令你變得更迷人,支持你」。

都市網推薦新聞

熱點新聞